24 اکتوبر 2014
وقت اشاعت: 10:48
’دنیا کی مزاحیہ ترین شخصیت‘:پاکستانی کامیڈین سعد ہارون فائنل میں
جیو نیوز - لاس ویگاس ......پاکستان میں انگریزی اسٹینڈ اپ کامیڈی میں اپنا نام بنانے والے نوجوان مزاح کار سعد ہارون امریکا میں ہونے والے "دنیا کی مزاحیہ ترین شخصیت"کے مقابلے میں کامیابیاں حاصل کرتے فائنل میں پہنچ چکے ہیں۔ اس مقابلے میں شریک دنیا بھر سے آئے فنکاروں سے ٹکرانے کے بعد سیمی فائنل میں10 بہترین کامیڈین میں سے سعد ہارون نے تین ہزار تین سوتیس ووٹ حاصل کر کے تیسری پوزیشن حاصل کی اور فائنل میں جگہ بنائی۔اس مقابلے کا فیصلہ کن معرکہ آج لاس ویگاس میں ہوگا۔مقابلے کے فاتح کا فیصلہ دنیا بھر سے آن لائن ووٹ کے ذریعے ہوگا۔"دنیا کی مزاحیہ ترین شخصیت" کا خطاب جیتنے والے شخص کو دس ہزار امریکی ڈالر بطور انعامی رقم دی جائے گی اور اس کے ساتھ پورے امریکا میں کامیڈی ٹور کا معاہدہ کیا جائے گا۔فائنل میں پہنچنے والے دیگر امیدواروں کا تعلق فن لینڈ، فرانس، اسپین اور متحدہ عرب امارات سے ہے۔اس مقابلے کا انعقاد ہالی ووڈ کے مقبول کامیڈی کلب ” لاف فیکٹری " نے کیا ہے۔
