پاکستانی مواصلاتی سیارچہ اپنے آزمائشی مدار میں داخل

چین کی مدد سے زمین کے گرد بھیجا گیا پاکستانی مواصلاتی سیارچہ اپنے آزمائشی مدار میں داخل ہو گیا۔ یہ مدار زمین کے مشرقی طول بلد سے 37.8 درجے پر واقع ہے۔ چائنا گریٹ وال انڈسٹری کارپوریشن (سی جی ڈبلیو آئی سی) کی طرف سے جاری بیان کے مطابق پاک سیٹ ون آر کو 12 اگست کو چین کے جنوب مغربی صوبہ سیچوان کے شیچانگ سیٹلائٹ لانچ سنٹر سے روانہ کیا گیا تھا۔ مواصلاتی سیارچے کا حتمی مدار زمین کے مشرقی طول بلد سے 38 درجے پر واقع ہے جس میں یہ جلد داخل ہو جائے گا۔



واضح رہے کہ پاک سیٹ ون آر چین کی طرف سے کسی بھی ایشیائی ملک کا زمین کے گرد مدار میں پہنچایا جانے والا پہلا سیارچہ ہے۔ یہ سیارچہ انٹرنیٹ اور مواصلاتی سرگرمیوں کے دائرہ کار کو یورپ، جنوبی ایشیا، مشرق وسطیٰ اور مشرقی افریقہ تک وسعت دینے میں معاون ثابت ہوگا۔ پاکستان نے اس سے قبل 1990ءمیں اپنا مواصلاتی سیارچہ بدر اے چین کے تعاون سے زمین کے گرد مدار میں روانہ کیا تھا۔