ذیابیطس کی ادویات پھیپھڑوں کے سرطان کیلئے بھی مفید

امریکی ماہرین نے ذیابیطس کے مرض کیلئے استعمال کی جانے والی ادویات کو پھیپھڑوں کے سرطان کیلئے بھی مفید قرار دے دیا ہے۔ '' میٹ فورمائین'' نامی دوا پر کئے جانے والے تجربات کے بعد امریکن کالج آف چسٹ فزیشن نے کہا ہے کہ ذیابیطس کی ادویات سے پھیپھڑوں کے سرطان کے خطرے کوبھی روکا جا سکتا ہے۔ اس ضمن میں دیگر ادویات کے بھی تجزیے کئے جا چکے ہیں۔ ماہرین نے پھیپھڑوں کے سرطان اور ذیابیطس کے 157 مریضوں میں اس تعلق کو جاننے کیلئے ان کے ریکارڈ کا تفصیلی جائزہ بھی لیا اور دنیا بھر کی مختلف ملٹی نیشنل فارماسیوٹیکل کمپنیوں کی مختلف ادویات کے اثرات بھی دیکھے،مگر اس کے باوجود تحقیق کے سربراہ ڈاکٹر ڈیوڈ گوئرمین نے مزید تحقیق کی ضرورت پر زور دیا ہے۔ انہوں نے کہا کہ اس تحقیق سے ایک راستہ ضرور کھلا ہے مگر پھیپھڑوں کے سرطان پر مکمل کنٹرول کیلئے ان ادویات پر مکمل بھروسہ کرنا درست نہ ہوگا۔