پنجاب میں 2 اور شہری ڈینگی وائرس کا شکاربن گئے

لاہور…پنجاب میں ڈینگی وائرس نے دو اور جانیں لے لیں۔ صوبے میں مرنے والوں کی تعداد 8ہو گئی۔ 24گھنٹوں کے دوران مزید 59 افراد میں ڈینگی وائرس کی تصدیق ہوئی ہے۔ محکمہ صحت نے اپنی غفلت کو چھپانے کے لیے موسم کو قصور وار ٹھہرا دیا۔ پنجاب میں ڈینگی وائرس قابو سے باہر ہو گیا۔ روزانہ بڑی تعداد میں مریض اسپتال پہنچنے لگے۔ محکمہ صحت کے مطابق صوبے میں 974 افراد میں ڈینگی وائرس کی تصدیق ہو چکی ہے۔ اس وائرس نے لاہور کو سب سے زیادہ متاثر کیا، جہاں 440 مریض اسپتالوں میں زیر علاج ہیں۔ اسپیشل سیکرٹری صحت بابر حیات کہتے ہیں کہ ڈینگی مچھر گھروں میں داخل ہو رہا ہے شہری خیال رکھیں۔طبی ماہرین کا کہنا ہے کہ مچھر زیادہ ہونے سے ڈینگی وائرس پھیلا۔ درجہ حرارت 16 ڈگری سینٹی گریڈ سے کم ہونے پر ہی اس سے جان چھوٹے گی۔شہریوں کا کہنا ہے کہ محکمہ صحت صرف میٹنگز میں وقت ضائع کرنے کی بجائے اسپرے اور لاروے کی تلفی کیلئے کام کرتا تو اتنی بڑی تعداد میں لوگ بیمار نہ پڑتے۔