پارکنسن کے مرض کا ربط مدافعتی نظام سے

پارکنسن کا مرض فالج کی ایک بتدریج بڑھتی ہوئی صورت ہے۔ جس کی نمایاں علامات عضلات میں لچک کا ضیاع رعشہ اور متزلزل چال ہوتی ہے۔امریکی محققین کا کہنا ہے کہ انسانی جسم کے اندر پایا جانے والے مدافعتی نظام یا Immune system پارکنسنیت کے شکار انسانوں کے اندر غیر معمولی اہمیت کا حامل ہوتا ہے اور نہایت اہم کردار ادا کرتا ہے۔امریکی طبی سائنسدانوں کی 20 سال پر محیط ریسرچ، جس میں چار ہزار لوگوں پر تحقیق کی گئی اور جن میں سے نصف پارکنسن کی بیماری میں مبتلا تھے سے پتا چلا کہ پارکنسن کے عارضے اور انسانی جسم میں پائے جانے والے جینز جو امیون سسٹم یا مدافعتی نظام کو برقراررکھتے ہیں میں گہرا تعلق پایا جاتا ہے۔ ایک طبی جریدے میں شائع ہونے والی اس رپورٹ سے یہ امکان بھی سامنے آیا ہے کہ پارکنسن کی بیماری کی نئی ادویات تیار کی جا سکیں گی۔ پارکنسن کے برطانوی ادارے کا کہنا ہے کہ اس سے مدافعتی قوت کی اہمیت اور زیادہ اجاگر ہو گئی ہے۔ امریکی محققین کی یہ ٹیم نہ صرف پارکنسن کی بیماری کی جینیاتی وجوہات کا مطالعہ کر رہی تھی بلکہ شفا خانوں اور ماحولیات پر بھی ریسرچ کر رہی تھی، جن کے براہ راست اثرات مریضوں پر مرتب ہوتے ہیں۔ اس تحقیق کے دوران انہیں معلوم ہوا کہ جینز کا وہ گروپ جسے HLA کہا جاتا ہے، کا پارکنسن سے گہرا تعلق ہے۔ یہ وہ جینز ہیں، جو انسانی جسم کے خلیوں اور بیماری کے حامل بیرونی حملہ آورں میں تمیز کرتے ہیں اور انسانی جسم کے امیون سسٹم کو اس قابل بناتے ہیں کہ وہ جسم کا دفاع کرے، بغیر کسی اندرونی نقصان کے۔ تاہم مداقعتی نظام ہمیشہ اور ہر انسان میں پائیدار نہیں ہوتا۔جینز ہر انسان کے اندر مختلف ہوتے ہیں۔ کچھ جینز ایسے ہوتے ہیں، جو متعدی امراض کے خلاف جسم کو محفوظ رکھتے ہیں اور کچھ ایسے ہیں، جن کی وجہ سے امیون سسٹم ہی جسم کے خلیوں پر حملہ کرتا ہے اور اْسے کمزور کر دیتا ہے۔ اس بارے میں طبی ماہرین کو پہلے سے ہی اس امر کا اندازہ تھا کہ جو لوگ درد کش ادویات مثلاً Ibuprofin استعمال کرتے ہیں ان پر پارکنسن کا حملہ کم ہوتا ہے۔ تاہم ایسا ہر انسان کے ساتھ یکساں نہیں ہوتا کیونکہ ہر کسی کا جین دوسرے سے مختلف ہوتا ہے۔ محققین نے کہا ہے کہ جب انہیں پارکنسن کے عارضے، امیون سسٹم یا قوت مدافعت اوردردیا سوزش کے درمیان تعلق بہتر طور پر سمجھ میں آ جائے گا، تو وہ اس بیماری کی کوئی موثر دوا بنانے میں کامیابی حاصل کر لیں گے۔