وٹامن بی الزائمر کو آہستہ کر دیتا ہے

الزائمر کی بیماری میں دماغ بڑی تیزی سے سکڑ جاتا ہے
ایک نئی تحقیق کے مطابق وٹامن بی زیادہ مقدار میں کھانے سے ان بوڑھے افراد میں دماغ سکڑنے کی رفتار کم ہو جاتی ہے جن کو الزائمر کی بیماری لاحق سکتی ہے۔

تحقیق کاروں کے مطابق یہ الزائمر کی بیماری ہونے میں تاخیر کا پتہ لگانے کے سلسلے میں پہلا قدم ہو سکتا ہے۔

الزائمر بیماری میں بوڑھاپے میں انسان کی یاد داشت بہت تیزی سے جاتی رہتی ہے اور اس بیماری کا کوئی علاج نہیں ہے۔ اس بیماری کی وجہ سے سوچنے سمجھنے کی صلاحیت ختم ہوجاتی ہے۔ انسان ذہنی طور پر خالی ہوجاتا ہے اور بالآخر اس کی موت ہو جاتی ہے۔

ماہرین کا خیال ہے کہ یہ نتائج بہت اہم لیکن اس سے زیادہ تحقیق کی ضرورت ہے۔

پبلک لائبریری سائنس ون جریدے میں چھپنے والی تحقیق میں 168 بوڑھے افراد کے دماغ کے انحطاط کے درجوں کا مطالعہ کیا گیا ہے، جسے مائلڈ کوگنیٹو امپیئرمنٹ کہتے ہیں۔

اس تحقیق کے دوران تقریباً آدھے سے زیادہ افراد کو وٹامن بی کی عام دی جانے والی مقدار سے زیادہ تعداد میں گولیاں دی گئیں۔ باقی آدھے افراد کو صرف نفسیاتی اثر ڈالنے کے لیے جھوٹ موٹ کی دوا دی گئی۔

دو سال کے بعد یہ ماپا گیا کہ کس شرح سے دماغ سکڑا ہے۔

ساٹھ سال کی عمر کے بعد اوسطاً دماغ 0.5 فیصد سکڑتا ہے۔ جن لوگوں کو مائلڈ کوگنیٹو امپیئرمنٹ ہے ان کا دماغ تیزی سے سکڑتا ہے۔ اور الزائمر کے مریض کا دماغ ایک سال میں 2.5 فیصد سکڑتا ہے۔

اس تحقیق کے دوران پتہ چلا کہ جن افراد کو زیادہ مقدار میں وٹامن دی گئی تھی ان کے دماغ سکڑنے کے عمل میں 30 فیصد تک کمی آئی۔ کچھ میں تو یہ کمی 50 فیصد سے بھی زیادہ کم نوٹ کی گئی ہے۔