بجلی کی طویل بندش کے خلاف سندھ اسمبلی میں احتجاج

جیو نیوز - کراچی…سندھ اسمبلی میں پیپلزپارٹی ایم کیو ایم کے اراکین کا صوبے میں غیراعلانیہ طویل لوڈ شیڈنگ کے خلاف احتجاج کیاہے، پیپلزپارٹی کے ارکان نے سندھ حکومت سے مطالبہ کیا کہ عوام سے ہونے والی زیادتی پر وفاقی حکومت سے احتجاج کیا جائے وگرنہ صوبے بھرمیں دھرنے دیے جائیں گے۔ڈپٹی اسپیکرشہلارضا کی صدارت میں سندھ اسمبلی کا اجلاس جاری ہے،ایوان میں پیپلزپارٹی کے نوازچانڈیواورایم کیوایم کے محمد حسین دیگرنے سندھ میں طویل دورانیہ کی لوڈ شیڈنگ پراحتجاج کرتے ہوئے اسے وفاقی حکومت کا سندھ سے انتقام قراردیا ،ارکان نے مطالبہ کیا کہ سندھ حکومت وفاق سے احتجاج کرے اورسندھ کواس کے حصہ کی بجلی دلائے اگرلوڈ شیڈنگ کا سلسلہ بند نہ کیا گیا تو دھرنے دیں گے ،ادھرمسلم لیگ نون کے عرفان اللہ مروت کاکہنا تھا کہ قائم علی شاہ شہبازشریف کی طرح جلوس نکالیں ہم ساتھ دیں گے، ٹھنڈے کمرے میں بیٹھنے والوں کو پتہ چلے کہ لوڈ شیڈنگ کیا ہے، سینئرصوبائی وزیرنثارکھوڑو نے اپوزیشن رکن کے ریمارکس پراستفسارکیا کہ کب جلوس نکالیں،ابھی چلیں۔صورتحال کشیدہ ہونے پرڈپٹی اسپیکرکی مداخلت سے صورتحال کنٹرول کرلی گئی ،ایک موقع پرارکان کے بے قابو ہونے پرڈپٹی اسپیکرنے اجلاس ملتوی کرنے کی بھی وارننگ دی۔