کراچی : سول اسپتال میں زیر علاج خاتون کی دو سال کی بچی لاپتہ

جیو نیوز - کراچی …کراچی کے سول اسپتال میں زیر علاج خاتون کی دو سال کی بچی لاپتا ہوگئی۔ بچی کی ماں ڈیڑھ ماہ پہلے علاج کروانے گڑھی یاسین سے کراچی آئی تھی۔بیماری تو دور نہ ہوئی،اس کی بچی ہی اس سے دور ہوگئی۔دو سال کی نیناں کو رات کی تاریکی میں باپ کے ساتھ سوتے ہوئے سول اسپتال کراچی سے کسی نے مبینہ طور پر اغواء کرلیا گیا۔ اب اس ماں کی بے چینی ہے اورآہ و زاری ہے، جیسے کسی پل چین نہیں۔بچی کے باپ کا کہنا ہے کہ بچی اسکے پہلو میں اسپتال کے بر آمدے میں سو رہی تھی صبح آنکھ کھلی تو بچی موجود نہیں تھی۔اسپتال میں کئی سی سی ٹی وی کیمرے موجود ہیں لیکن اب تک ان کی جانچ پرتال نہیں کی گئی ہے۔ انتظامیہ کا کہنا ہے کہ معاملہ پولیس کے پاس پہنچ چکا ہے انہیں اور اگر پولیس کو ضرورت پڑی تو انتظامیہ انہیں فوٹیج مہیا کرے گی۔اس طرح کے واقعات سول اسپتال میں پہلے بھی کئی مرتبہ ہوچکے ہیں لیکن ان کے سد باب کے لئے کوئی خاطر خواہ انتطامات آج تک نہیں کئے گئے۔ماں کا کہنا ہے کہ اسے علاج نہیں اپنی بیٹی چاہئے۔