عمران خان کا الزام سچ ثابت ہوجائے تو مستعفی ہوجاوٴں گا، کامران خان

جیو نیوز - کراچی…سینئر تجزیہ کار اور صحافی کامران خان نے جنگ اور جیونیوز پر الزامات کے ردعمل میں کہا ہے کہ عمران خان کون سے ایجنڈے کی بات کررہے ہیں جس کی انہیں 32سالہ کیریئر میں کبھی ہوا نہ ہوئی، عمران خان کے پاس ثبوت ہیں تو سامنے لائیں، ورنہ اپنی سزا خود تجویز کردیں۔ عمران خان کے جنگ گروپ اور جیو پر الزامات کے جواب میں کامران خان نے کہا کہ وہ ان الزامات کو اپنے اوپر الزام تصور کرتے ہیں لیکن وہ دعوے سے کہہ سکتے ہیں کہ 32سالہ کیریئر میں ادارے کے سربراہ کی طرف سے ان پر کسی مخصوص قسم کی خبر دینے یا کسی خبر کو روکنے کیلئے دباوٴ نہیں ڈالا گیا۔ اپنے دعوے کی تائید میں مثال دیتے ہوئے کامران خان نے کہا کہ اس سے زیادہ آزادانہ پالیسی کیا ہوگی کہ وہ خود جیو پر بیٹھ کر ادارے کی پالیسی پر تحفظات کا اظہار کرتے ہیں۔ کامران خان نے عمران خان کو بنا ثبوت الزامات سے باز رہنے کی تاکید کرتے ہوئے کہا کہ اگرالزام سچ ہیں تو ہم سزا کے لیے تیار ہیں وگرنہ عمران خان بھی اپنی سزا خود بتادیں۔