کراچی :فائرنگ سے 2 افراد جاں بحق، مقابلے میں 2 اغوا کار ہلاک

جیو نیوز - کراچی..........کراچی میں علی الصبح فائرنگ کرکے دو افراد کو قتل کردیا گیا جبکہ پولیس مقابلے میں دو اغواء کار مارے گئے۔ اغوا ہونے والی دوسالہ بچی کو بازیاب کرالیا گیا۔ پولیس کے مطابق لیاری لیاری جنرل اسپتال کے قریب موٹر سائیکل سوار ملزمان نے 50سالہ شخص کو نشانہ بنایا اورنگی ٹاؤن مومن آباد میں مسلح ملزمان نے فائرنگ کرکے ایک شخص کو قتل کیا جس کی شناخت نہیں ہوسکی۔ دوسری جانب ایس پی اختر فاروق کے مطابق کورنگی انڈسڑیل ایریا ندی بند نمبر5 کے قریب مبینہ پولیس مقابلے کے دوران 2 اغواء کار مارے گئے، جن کی شناخت بلال اور انوار الحق کے ناموں سے ہوئی ہے۔ ملزمان کے قبضے سے 2 ٹی ٹی پستول بھی برآمد ہوئے ہیں۔اغواء کاروں کے قبضے سے گزشتہ دوپہر اغواء کی جانے والی 2 سالہ بچی یمنا بھی بازیاب ہوئی تھی۔اغواء کاروں نے بچی کی رہائی کے لئے 5لاکھ روپے تاوان طلب کیا تھا۔پولیس حکام کا کہنا ہے کہ اغواء کاروں کے 2 ساتھی فرار بھی ہوگئے ہیں۔کراچی کے علاقے سرجانی ٹاؤن سیکٹر50 ڈی میں کریکردھماکا ہوا۔ پولیس کے مطابق سڑک پر بچے کو بال بم پڑا ہوا ملا تھا جس کے کھیلنے کے دوران دھماکا ہوا اور بچہ زخمی ہوگیا۔ بم ڈسپوزل اسکواڈ نے موقع پر پہنچ کر ملنے والے ایک اور بال بم کو ناکارہ بنادیا۔