ایدھی سینٹر کراچی میں ڈکیتی کے ملزمان کی نشاندہی ہوگئی

جیو نیوز - کراچی.........افضل ندیم ڈوگر.........کراچی میں ایدھی ہیڈآفس میں ڈکیتی کی منصوبہ بندی میں پولیس کو گھر کے بھیدی کے ملوث ہونے کا شبہ ہے۔ واردات کے سرغنہ کی نشاندہی ہوگئی ہے جس کے گھر پر چھاپہ بھی مارا گیا۔ بین الاقوامی انسانی خدمت گار اور ایدھی فاؤنڈیشن کے سربراہ 85 سالہ عبدالستار ایدھی کو اولڈ کراچی کے علاقے میٹھادر میں ان کے مرکزی دفتر اور رہائش گاہ میں اتوار کی صبح 5مسلح ملزمان نے آدھے گھنٹے تک پستولوں کی زد میں رکھا۔ کسی بھیدی سے مسلسل ٹیلی فون پر رابطہ رکھے ہوئے ملزمان نے صرف بتائی گئی الماریوں اور لاکرز کو توڑا۔ ملزمان کے 5سے زائد ساتھی ایدھی ہیڈ آفس کے باہر نگرانی کررہے تھے۔ پولیس کو اس واردات میں گھر کے بھی بھیدی کے لنکا ڈھانے کا شبہ ہے، اسی بنیاد پر ایدھی ہیڈ آفس کے تمام متعلقین کا موبائل فونز کا ڈیٹا حاصل کرلیا گیا ہے۔ 7خواتین سمیت ایدھی سینٹر کے 16رضاکاروں کے بیانات قلمبند کرلئے گئے ہیں، ان کے خاندانی پس منظر کی تفصیلات بھی حاصل کی جارہی ہیں۔ پولیس کے مطابق وقوعہ کے دن اچانک چھٹی کرنے والی ایک خاتون رضا کار سے بھی پوچھ گچھ کی جارہی ہے۔ پولیس کے مطابق واردات کے سلسلے میں علاقے کی جیو فینسگ بھی کرلی گئی ہے اور ابتدائی طور پر تین ہزار موبائل فونز کا ڈیٹا ملا ہے جس کی اسکریننگ کی جا رہی ہے۔ ملزمان کے فنگر پرنٹ اور سی سی ٹی فوٹیج بھی حاصل کرلی گئی ہے۔ پولیس کے مطابق واردات میں ملوث 8ملزمان کے خاکے تیار کئے جارہے ہیں۔ پولیس کے مطابق ابتدائی تفتیش کے دوران ڈکیتی میں ملوث ایک ایسے ملزم کی نشاندہی ہوگئی ہے جو اس واردات کا سرغنہ معلوم ہوتا ہے، اس ملزم کے گھر پر ماری پور میں چھاپہ مارا گیا تو گھر پر تالا لگا تھا۔ پولیس کے مطابق یہ ملزم گذشتہ 6ماہ سے عبدالستار ایدھی سے ملنے کے لئے اس دفتر میں آتا رہا۔ ابتدائی تخمینے کے مطابق واردات میں زکوٰۃ، صدقات، خیرات اور انسانی خدمت کے لئے رکھے گئے مجموعی طور پر ایک سو ملین روپے مالیت کی کرنسی اور سونا لوٹا گیا، جس میں ساڑھے چار لاکھ امریکی ڈالر، ہزاروں پاؤنڈ، دو کروڑ روپے نقد پانچ کلوگرام سونا اور دیگر سامان شامل ہے تاہم کھارادر تھانے میں فیصل ایدھی کی مدعیت میں درج آیف آئی آر میں لاٹی گئی مالیت کا تذکرہ نہیں۔دوسری جانب کراچی پولیس کے سربراہ غلام قادر تھیبو نے ملزمان سے صدقات اور خیرات کا مال اسباب واپس کرنے کی اپیل کی ہے۔