انفارمیشن ٹیکنالوجی کا استعمال وقت کا اہم ترین تقاضا ہے،شہباز شریف

جیو نیوز - لاہور.....وزیر اعلیٰ پنجاب شہباز شریف کا کہنا ہے کہ انفارمیشن ٹیکنالوجی کا استعمال وقت کا اہم ترین تقاضا ہے،صوبائی حکومت ای گورننس کے فروغ اور منصوبوں کی مانیٹرنگ کیلئے اس سے بھرپور استفادہ کر رہی ہے۔

وزیراعلیٰ شہباز شریف سے چین کے انفارمیشن ٹیکنالوجی انڈسٹری کے وفد نے ملاقات کی ،جس میں لاہور میں آئی ٹی انڈسٹری پارک کے منصوبے کی تجویز پر تبادلہ خیال کیا گیا ۔

اس موقع شہبازشریف نے کہا کہ پنجاب حکومت کاروبار حکومت اور امور کی نگرانی کیلئے جدید علوم کو بھرپور انداز میں بروئے کار لا رہی ہے ،آئی ٹی انڈسٹری پارک کی تجویز خوش آئند ہے،حکومت اس ضمن میں ہر سہولتیں فراہم کرے گی۔

چینی وفد کاکہنا تھا کہ وزیراعلیٰ شہبازشریف کے ترقیاتی منصوبوں اور کامیابیوں سے وہ بہت متاثرہوئے ہیں۔