یوم پاکستان پریڈ، مارچ پاسٹ اور فلائی پاسٹ ہو گا

جیو نیوز - اسلام آباد...... 23 مارچ کو یوم پاکستان کی پریڈ، سبز ہلالی پرچم کے سائے تلے سینوں پر میڈل سجائے، مادر وطن کے دفاع کا عزم لیے، مسلح افواج کے جوان مارچ پاسٹ اور فلائی پاسٹ کریں گے۔

یوم پاکستان کی پریڈ اپنے اندر ایک پوری تاریخ سموئے ہوئے ہے۔ 23مارچ 1956 کو باقاعدہ طور پر مسلح افواج کی پریڈ شروع ہوئی، جو 1960 تک کراچی اور 1964 سے 1988 تک راولپنڈی کے ریس کورس گراؤنڈ میں ہوتی رہی، 1989 میں اس وقت کی وزیراعظم محترمہ بینظیربھٹو نے یوم پاکستان پریڈ کو اسلام آباد منتقل کردیا۔

2002 میں پاک بھارت سرحدی تناؤ، 2003 میں عراق پر امریکی حملےاور 2004 میں سیکورٹی وجوہات کی بناء پر جبکہ اکتوبر 2005 کے تباہ کن زلزلے کے باعث 2006 میں بھی پریڈ نا ہوسکی۔ ملک میں جاری دہشت گردی کے خلاف جنگ اورسیکورٹی خدشات کے باعث 2008 کے بعد بھی 6 سال تک پریڈ نا ہوسکی اور پھر2015 میں پریڈ کے لیے شکرپڑیاں کے قریب نیا پریڈ گراؤنڈ مختص کردیا گیا۔

اس سال یوم پاکستان پر ہونے والی پریڈ میں فلائی پاسٹ کی قیادت فضائیہ کے سربراہ ایئرچیف مارشل سہیل امان کریں گے، جی او سی اسپیشل سروسز گروپ میجرجنرل پیرا ٹروپرز کے ہمراہ دس ہزار فٹ کی بلندی سے فری فال کا مظاہرہ کریں گے، چین کی طرف سے تحفے میں دیے گئے جنگی ہیلی کاپٹر زی 10 اور ترکی کے تربیتی طیارے ٹی 37 پہلی بار پریڈ کا حصہ بن رہے ہیں، پہلی بار بلوچستان کے فلوٹ پرچین کا جھنڈا بھی لہرایا جا رہا ہے۔

پریڈ میں سٹیلتھ ٹیکنالوجی سے لیس اور ایٹمی وار ہیڈ لےجانے والے میزائل سسٹمز، اسلحہ بردار ڈرون "برق" اور گائیڈڈ میزائل "براق" ایف 16 اور پاک چین اشتراک سے بنا جے ایف 17 تھنڈر پریڈ کا حصہ ہوں گے۔