امریکہ :خاتون پولیس اہلکارنوکری کے پہلے روز ہی فائرنگ سے ہلاک

جیو نیوز - واشنگٹن......... امریکی ریاست ورجینیا میں ایک خاتون پولیس اہلکار کو ملازمت کے پہلے دن ہی گولی مار کر ہلاک کر دیا گیا ہے۔

ایشلے گوئنڈن نامی خاتون پولیس اہلکار کو اس وقت گولی ماری گئی جب وہ امریکی ریاست ورجینیا میں ووڈ برج نامی علاقے میں ایک مقامی تنازع کی اطلاعات ملنے پر وہاں پہنچیں۔ان کے علاوہ دو دیگر پولیس اہلکار زخمی بھی ہوئے جو اس وقت ہسپتال میں ہیں۔ ان کی حالت کے بارے میں ابھی تک کوئی تفصیلات موصول نہیں ہوئی ہیں۔

مشتبہ شخص جو کے فوج کے اہلکار ہیں کو کوئی نقصان نہیں ہوا اور وہ اس وقت پولیس کی حراست میں ہیں۔پولیس حکام نے خبر رساں ادارے اے پی کو بتایا کہ مشتبہ شخص نے پہلے اپنی اہلیہ کو قتل کیا اور پھر پولیس کے وہاں پہنچنے پر اہلکاروں پر فارئرنگ کر دی۔ان کے مطابق جس وقت یہ واقعہ پیش آیا اس وقت گھر میں ایک بچہ بھی موجود تھا۔

ایشلے گوئنڈن کے محکمے کی جانب سے جاری ہونے والے ایک بیان میں کہا گیا ہے کہ ہمیں انتہائی افسوس کے ساتھ یہ کہنا پڑ رہا ہے کہ پرنس ولیم کانٹی پولیس کی خاتون اہلکار ایشلے گوئنڈن جو کہ فائرنگ کے واقعے میں زخمی ہونے کے بعد دم توڑ گئی ہیں۔

اس سے قبل پرنس ولیم کانٹی پولیس نے گوئنڈن کے پولیس میں شامل ہونے کی تصویر ٹوئٹر ہر شائع کی تھی۔ اس موقع پر ان کی اور ان کے ساتھ بھرتی ہونے والے نئے ساتھیوں کی حفاظت پر زور دیا گیا تھا۔