سندھ میں بارشیں، خیرپور میں مزید 50دیہات زیر آب

جنگ نیوز -


کراچی…سندھ کے مختلف علاقوں میں بارش کی تباہ کاریاں جاری ہیں۔ خیر پور میں پچاس مزید دیہات زیر آب آگئے۔ٹنڈو آدم میں ریلوے ٹریک زمین میں دھنس جانے کے باعث اپ ٹریک پر آمدورفت معطل ہوگئی۔ ضلع بدین کی تحصیل ٹنڈو باگو میں ڈیہی جرکس کے مقام پر ایل بی او ڈی سیم نالے سے 7افراد کی لاشیں ملی ہیں۔ خیر پور کی تحصیلوں نارا اور فیض گنج میں گزشتہ رات بارشوں کے بعد ندی نالوں میں طغیانی آنے سے پچاس مزید دیہات زیر آب آگئے۔ عمر کوٹ کی تحصیل سامارو میں موسلادھار بارشوں کے بعد شہرمیں کئی فٹ پانی جمع ہوگیا۔ برساتی پانی کو نکالنے کے لئے شہریوں نے کنری روڈ پر کٹ لگادیا جس کے نتیجے میں گیارہ دیہات زیر آب آنے کا خطرہ ہے۔ نوشہروفیروزکے علاقے فھل کے قریب سیم نالے میں سو فٹ چوڑا شگاف پڑنے سے 3 دیہات زیر آب آگئے۔ میر پور خاص کے علاقے ٹنڈو آدم اور جلال مری کے درمیان ریلوے ٹریک کا کچھ حصہ بارش کے باعث زمین میں دھنس گیا جس کی وجہ سے قراقرم ایکسپریس کو ٹنڈو آدم کے قریب روک لیا گیا۔ دوسری جانب ٹنڈو محمد خان میں مختلف مقامات پر ریلوے ٹریک بارش کے پانی میں ڈوبا ہوا ہے جس کی وجہ سے ڈاوٴن ٹریک پر بھی ٹرینوں کی آمدورفت شدید متاثر ہے۔