آئی سی سی کا ایشیا ٹور سے متعلق کامران اکمل اور سلمان بٹ سے رابطہ

جنگ نیوز -
لندن . . . . . . . . میچ فکسنگ کا الزام پاکستانی کھلاڑیوں کی جان چھوڑتا نظر نہیں آتا ، ابھی نیوز آف دی ورلڈ کی تحقیقات جاری ہیں کہ ایک اور برطانوی اخبار نے نیا انکشاف کردیا ہے ، اخبار نے دعوی کیا ہے کہ آئی سی سی نے ایشیا کپ میں مبینہ اسپاٹ فکسنگ کی تحقیقات کے لیے سلمان بٹ اور کامران اکمل سے رابطہ کیا ہے ۔ برطانوی اخبار کے مطابق انٹرنیشنل کرکٹ کونسل نے رواں سال سری لنکامیں ہونے والے ایشیا کپ کے دوران میچ فکسنگ کی بازگشت سن کر تحقیقات کرنے کافیصلہ کیا ، جس کے لیے آئی سی سی نے اکیس اگست کو سلمان بٹ اور کامران اکمل کو خط لکھ کر ان سے ٹورنامنٹ کے دوران موبائل فونز کا ریکارڈ طلب کیا ہے ، یہ خط نیوز آف دی ورلڈ کی رپورٹ شائع ہونے سے پہلے لکھا گیا ، جس کے بعد نیوز آف دی ورلڈ کی رپورٹ نے تو رہی سہی کسر بھی پوری کردی ، ایک کے بعد ایک پاکستانی کھلاڑیوں کے گرد میچ فکسنگ کے الزامات اور ان کی تحقیقات کا دائرہ تنگ ہوتاجارہاہے، ایک اور اخبار کے مطابق آئی سی سی نے کامران اکمل کو آگاہ کیا ہے کہ سڈنی ٹیسٹ کے حوالے سے وہ اب بھی زیر تفتیش ہیں۔