چترال:برفانی تودے تلےدبے6 طلبہ کیلئے ریسکیو آپریشن شروع نہ ہوسکا

جیو نیوز - چترال......چترال کےعلاقے کریم آباد میں برفانی تودے میں دبنے والے 6 طالب علموں کے لیے گزشتہ شام کے بعد ریسکیو آپریشن اب تک شروع نہ ہوسکا، برفانی تودے تلے دبنے والے 8 افراد میں سے ایک شخص اور ایک طالب علم کی لاش گذشتہ روز نکال لی گئی تھی۔

ریسکیو ذرائع کے مطابق چترال کے مختلف دیہات کے 7 طلبا ہفتے کی شام کو سوسم گاؤں میں قائم اسکول سے اپنے گھروں کو واپس جارہے تھے کہ برفباری کے باعث راستہ بند ہوگیا۔

اس دوران ایک بہت بڑا برفانی تودہ ان پر آگرا جس سے تمام طلبہ اور ایک شخص دب گیا، تودہ کئی کلومیٹر علاقے پر پھیلا ہوا ہے۔

گزشتہ روز چترال اسکاؤٹس، پولیس اور مقامی افرا دنے ایک 35 سالہ شخص رحمت اور ایک مبشر نامی طالب علم کی لاش نکال لی تھی جبکہ عمران ،علی شان، محمد الہیٰ، فیض علی، ارشاد احمد اور محمد عمران لاپتہ ہیں۔

موسم ابرآلود ہونے کی وجہ سے آج ریسکیو آپریشن شروع نہیں کیاجاسکا، ڈپٹی کمشنر کے مطابق صوبائی حکومت نے حادثےمیں جاں بحق افراد کے ورثا کیلئے 3 لاکھ روپے فی کس امداد کا اعلان کیا ہے۔