وزیر اعظم کی زیر صدارت بجلی و لوڈ شیڈنگ کے معاملے پر اجلاس

جیو نیوز - اسلام آباد…وزیر اعظم کی زیر صدارت بجلی و لوڈ شیڈنگ کے معاملے پر غور کے لیے اجلاس ہوا۔ وزیراعظم نے گیس سپلائی فرٹیلائزر سیکٹر سے ہٹا کر پاور سیکٹر کو دینے کی ہدایت کر دی، سی این جی سیکٹر کو سپلائی بھی عارضی طور پر کم کرنے کی ہدایت،وزیراعظم نوازشریف نے ملک بھر میں لوڈشیڈنگ کے موجودہ دورانیے پر برہمی کا اظہار کرتے ہوئے اسے ناقابل قبول قرار دیاہے ، اگلے چند روز میں شہروں میں لوڈ شیڈنگ 6 اور دیہی علاقوں میں 7 گھنٹے تک لانے کی ہدایت کردی ہے۔ وزیر اعظم کو بتایا گیا ہے کہ رواں ماہ کے آخر تک سسٹم میں 35 سو میگا واٹ مزید بجلی شامل ہو جائے گی۔وزیراعظم نوازشریف کی زیر صدارت اجلاس کے دوران ملک میں بجلی کی پیداوار اور لوڈ شیڈنگ کی صورت حال پر غور کیاگیا۔ اجلاس میں وزیر اعلیٰ پنجاب شہباز شریف، پانی وبجلی، پیٹرولیم ،ریلوے کے وزراء اور دیگر حکام نے شرکت کی۔ وزیراعظم نے لوڈ شیڈنگ کے موجودہ دورانیے پر برہمی کا اظہار کرتے ہوئے کہا کہ یہ ناقابل قبول ہے اس کو اگلے چند روز میں ہرصورت کم سے کم کیا جائے اور شہروں میں لوڈ شیڈنگ 6 اور دیہی علاقوں میں 7 گھنٹے تک لائی جائے تاکہ موسم گرما میں عوام کے لیے مشکلات میں مزید اضافہ نہ ہو۔ وزیراعظم نے وزارت پانی وبجلی ،پیٹرولیم اور ریلوے کو ہدایت کی کہ جامشورو اور مظفرگڑھ پاور پلانٹس کو اضافی فیول فراہم کر کے ان سے 630 میگا واٹ مزید بجلی حاصل کی جائے۔وزیراعظم نے کہاکہ تاخیر اور کرپشن سے بچنے کے لیے ریلوے کے ذریعے بجلی گھروں کو ایندھن فراہم کیا جائے اور بند پڑے تین بجلی گھروں کو فوری طور پر فعال کیا جائے۔ وزیراعظم کو بریفنگ میں بتایاگیاکہ 11 مئی تک ایک ہزار میگاواٹ بجلی نیشنل گرڈ میں شامل ہو جائے گی اوررواں ماہ کے آخر تک سسٹم میں 35سو میگا واٹ بجلی آ جائے گی۔