ملک کے کئی علاقوں میں بارش اور بالائی علاقوں میں برف باری جاری

جنگ نیوز -
اسلام آباد…گلگت بلتستان ،آزادکشمیر، خیبرپختونخوا اور شمالی پنجاب سمیت ملک کے کئی علاقوں میں بارش اور بالائی علاقوں میں برف باری جاری ہے ۔ مسلسل بارش سے کئی فصلوں کو بھی نقصان پہنچا ہے ۔غذر شہر سمیت پورے ضلع میں موسلا دھار بارش اور پہاڑوں پر برفباری جاری ہے ۔اسکردو شہر میں بارش اوربالائی علاقوں میں وقفے وقفے سے ہلکی برفباری رات سے جاری ہے۔دیامیر،چلاس اورگردونواح میں موسلادھار بارش اور پہاڑوں پر برفباری ہو رہی ہے ۔استور میں مسلسل بارش اور بالائی علاقوں میں برفباری کی وجہ سے آلو ،مکئی کی فصل کے علاوہ خوبانی اور بادام کے درختوں کو بھی شدید نقصان پہنچ رہا ہے۔مری میں گزشتہ روز سے وقفے وقفے سے بارش اور ژالہ باری جاری ہے جس سے سردی کی شدت میں اضافہ ہوگیا ہے۔مظفرآباد،وادی نیلم ، ہٹیاں بالا اور چکار سمیت آزاد کشمیر کے مختلف بالائی علاقوں میں موسلادھار بارش کے باعث شاہراہ نیلم ڈھونگا کس کے مقام پر ،سری نگر اور مظفرآباد روڈ چکوٹھی کے مقام پر اور اسلام آباد مظفرآباد روڈ کوہالہ کے مقام پر لینڈ سلائیڈنگ کی وجہ سے بند کردی گئی ہے ۔اسلام آباداورراول پنڈی میں بھی آج صبح بارش ہوئی جس کے بعد موسم خوش گوار ہوگیا،سوات ،لوئر دیر ،ہری پور،مانسہرہ، کوہستان اور گردونواح میں آج دوسرے روز بھی وقفے وقفے سے بارش جاری ہے ۔