لیبیا: طرابلس میں گودام سے 53 افراد کی لاشیں برآمد

آج نیوز - لیبیا میں باغیوں نے تازہ حملہ میں جنوبی طرابلس فتح کرنے دعویٰ کردیا۔ طرابلس کے ایک گودام سے تریپن افراد کی لاشیں ملی ہیں۔ بینن اور نائیجرنے بھی لیبیا میں باغیوں کی حکومت تسلیم کرلی۔ لیبیا میں باغیوں کی پیش قدمی اورقذافی کے حامیوں کا دفاع جاری ہے۔ قذافی کے آبائی قصبہ سرت پر قبضہ کیلئے باغی پیش قدمی کررہے ہیں۔ ادھر باغیوں کے حامی سحر اور افطار میں انہیں مورچوں تک کھانا فراہم کر رہے ہیں۔ لوگوں کا کہنا ہے کہ وہ اپنی مرضی سے باغیوں کو سحری اور افطاری پہنچا رہے ہیں۔ باغیوں کے رہنما مصطفیٰ عبدالجلیل نے کہا ہے کہ قذافی اوران کے حامی ہتھیار ڈال دیں، وعدہ کرتے ہیں کہ ان کے خلاف شفاف قانونی کارروائی ہوگی۔ باغیوں نے انسانی حقوق کی تنظیموں سے فوری طور پرطرابلس میں ایمرجنسی انسانی امداد کا مطالبہ کیا ہے، بالخصوص شہر میں میڈیکل کی سہولیات نہ ہونے کے برابر ہیں۔